Laing drug den ang gibungkag sa mga sakop sa Philippine Drug Enforcement Agency (PDEA 7) uban sa Labangon Police Station, ala 1:25 sa hapon sa Huwebes, Marso 21, 2024, sa Sitio Tres de Abril, Barangay Punta Princesa, dakbayan sa Sugbo.
Atol sa operasyon, nadakpan ang tulo ka bag-ong identified drug personalities, nga naglakip sa drug maintainer nga si Benchie Dranto, 25, walay trabaho.
Ang mga naatlan sa sulod sa suyopanan mao sila si Dominador Ibarita Jr., 37, security guard; ug James Cabaluna, 30.
Nasakmit sa mga agent ang 10 ka putos sa gituohang shabu nga dunay estimated average market value nga P74,800, buy-bust money, lakip na ang drug paraphernalia.
Sigun ni Leia Alcantara, information officer sa PDEA 7, nga usa ka semana nila nga gipaubos sa case build up ug nasuta nga maka dispose ang target sa operation og 20 gramos matag semana. Kasagaran sa iyang mga kustomer mao ang mga drayber sa public utility vehicle (PUV). / AYB