Kagamitan sa paghimo og paltik nga mga armas ang gitahan sa mga sakop sa 701st Maneuver Company sa Regional Mobile Force Battalion 7 alas 4:50 sa hapon, Miyerkules, Hunyo 4, 2025, sa Barangay Cahumayan, Siyudad sa Danao.
Usa ka concern barangay official ang boluntaryo nga nitahan sa mga gamit sa paggama og armas ngadto sa mga sakop sa RMFB 7 sa pakig-alayon sa Danao City Police Station.
Ang mga gamit naglangkob sa 3 ka unit sa bench drill press, 12 ka bench vise, 8 units sa hacksaw, 130 ka steel files, 3 ka firearms pattern/frame, 2 pieces sa barrels, 2 pieces sa slides/upper receivers, 4 ka magazines, 7 ka grinders ug usa ka portable welding machine.
Ang mga nakuha nga mga equipment ang kasamtangan nga gikustodiya sa RMFB 7 alang sa himuon nga documentation ug disposition.
Si Police Brigadier General Redrico Maranan ang hepe sa Police Regional Office 7 nagkanayon nga ang malampuson nga pagkasakmit sa mga gamit sa paghimo og paltik nga mga armas, magpamatuod sa ilang commitment paglimpyo sa Central Visayas sa loose firearms ug paghunong sa gun manufacturing sa maong dakbayan.
Iyang gipahalipayan ang iyang mga sakop ilabi na ang RMFB 7 ug nidayeg sa barangay officials nga nisanong sa iyang panawagan nga mokuoperar sa ilang hugot nga kampanya pagpuhag sa paghimo og armas sa maong siyudad.
“A safer, gun-free Central Visayas is within reach, and we will get there—one successful operation at a time,” matod ni Maranan.
Dugang awhag ni Maranan sa publiko nga mo-report dayon sa kapulisan kon dunay kadudahan nga tighimo og armas sa ilang lugar aron maaksiyonan dayon nila pinaagi sa paglusad og operation. / AYB