Laing grass fire sa Argao

SUNOG SA KASAGBUTAN: Kabahin kini sa upat ka ektarya nga grass fire sa Argao, alas 6:46 sa gabii sa Martes, Mayo 7,   2024. /
SUNOG SA KASAGBUTAN: Kabahin kini sa upat ka ektarya nga grass fire sa Argao, alas 6:46 sa gabii sa Martes, Mayo 7, 2024. / Hulagway iya ni Eric Chavez Lovitos

Upat ka ektarya ang gilamoy sa grass fire nga niigo sa utlanan sa tulo ka mga barangay sa lungsod sa Argao, alas 6:46 sa gabii sa Martes, Mayo 7, 2024.

Si F01 Leo Vincent Goyo, tigpamaba sa kabumberohan sa Argao nga gikahinabi sa Superbalita Cebu, niingon nga ang sunog gideklarar nga fire out sa alas 9:01 sa gabii sa Mayo 7, 2024.

Matod niya nga ang tulo ka barangay boundary sa Liptong, Sityo Canduran nga giutlan sa mga bukirang barangay sa Tulic , Lamacan ug Jomgao.

Si Goyo niingon nga sila naglisod sa pagkombati sa kayo gumikan kay di matangas sa ilang firetruck ang tibuok bukid.

Ang kayo nakontrolar pinaagi sa tabang sa mga residente sa maong dapit aron di makadulhog ang grass fire ngadto sa kabalayan sa ubos.

Matod niya nga kugon ug mga punoan sa lumboy ug mangga ang nangasunog.

Way nakatug-an kon may nagdaub ba sa maong dapit nga hayan maoy hinungdan sa dakong grass fire.

Si Goyo nagkanayon nga sukad sa buwan sa Abril 2024, sila nakatala na og 34 ka grass fire. Niini lang pipila ka mga adlaw sa Mayo, sila nakatala na og dili mominos 10 ka mga grassfire.

Apan ang labing ulahi nga grass fire maoy labing dako nga sunog sa kasagbutan sa lungsod. / DVG

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph