GIAWHAG ni outgoing vice mayor, karon Acting Mayor, Donald “Dondon” Hontiveros ang tanang residente ug stakeholders sa pagsalmot sa umaabot nga Cebu City-wide cleanup drive karong Sabado, Hunyo 21, 2025.
Tumong sa inisyatiba ang walo ka krusyal nga suba sa tibuok Dakbayan sa Sugbo: Bulacao River, Tagunol Creek, Kinalumsan River, Guadalupe River, Lahug River, Mahiga River, Butuanon River, ug Estero de Parian, matod ni Rachel Gibson kinsa empleyado gikan sa Vice Mayor’s Office.
Gidasig sab ni Hontiveros ang partisipasyon sa mga iskolar sa Dakbayan sa Sugbo aron suportahan kining usa ka mahinungdanong environmental nga buluhaton isip usa ka panamilit nga gasa sa iyang termino.
“Mo-request ko sa mga scholars, considering daghan kaayo tag scholars, ilang assignment na lang gyud and request nako as a parting gift to me,” matod ni Hontiveros sa usa ka interbyu niadtong Lunes, Hunyo 16.
Gipamatud-an sa acting mayor ang iyang pasalig sa adbokasiya sa kalikupan, bisan lapas pa sa iyang termino nga nagpahayag nga magpadayon siya sa pagsuporta sa mga inisyatibo sa iyang pribadong kapasidad.
Si Editha Peros, pangulo sa Cebu City Environment and Natural Resources Office (Ccenro), nipasabot sa kamahinungdanon sa regular nga cleanup drive nga usa ka paningkamot nga makatampo sa pagpagaan sa baha.
Gibutyag sab ni Peros sa linain nga pakighinabi niadtong Lunes nga ang Ccenro nagtinguha nga ang matag barangay makasumite ug binuwan nga solid waste management plan.
Iyang gipadayag ang tumong sa buhatan alang sa mga barangay nga magtukod og trash traps o bio-fences, nga maoy mopugong sa mga basura nga molahos sa dagat. / Antonette Arrabis, CNU Intern