LAING marijuana plantation nga nahimutang sa Sitio Lupa, Barangay Sudlon II, bukirang dapit sa Siyudad sa Sugbo ang gironda sa mga sakop sa City Mobile Force Company (CMFC) sa Cebu City Police Office alas 10:15 sa buntag sa Biyernes, Abril 11, 2025.
Malampuson nga naibot sa mga personnel sa CMFC, inabagan sa Regional Police Drug Enforcement Unit 7, ang gibana bana nga pito ka libo nga punoan sa marijuana nga mobalor sa P1.5 million. Atol sa operation, walay naabtan nga mag-uuma.
Unang nakadawat og report ang kapulisan sa Dakbayan sa Sugbo nga dunay marijuana plantation sa managlahing lugar sa Barangay Sudlon II.
Gi-validate dayon sa CMFC ang maong report ug sa dihang nakumpirmar, gilusad dayon nila ang operasyon.
Gipangsunog na sa lugar ang mga naibot nga marijuana.
Nagkuha lang og sample ang CMFC sa marijuana aron i-submit sa PNP Forensic Unit 7 alang sa chemical analysis.
Niadtong Miyerkules, Abril 9, 2025, ang mga sakop sa Police Drug Enforcement Group (PDEG) 7 ug Special Operation Unit 7 nakaibot usab og 6,000 ka punoan sa marijuana nga mobalor sa P1.2 milyunes sa Sitio Maraag sa nahisgutang barangay. / AYB