Laing Pinoy weightlifter nga si John Ceniza, ang naka-qualify alang sa 2024 Paris Olympics human sa maayo niyang kampanya sa 61-kg event sa 2024 IWF World Cup niadtong Martes, Abril 2, 2024, sa Thailand.
Gianunsyo kini sa Philippine Olympic Committee (POC) sa ilang social media post.
Si Ceniza, 26, maoy ikaduhang weightlifter sa Pilipinas nga nakakuha og tiket alang sa Summer Games sunod ni Rosegie Ramos, kinsa naka-qualify sa women’s 49-kg event niadtong Lunes, Abril 1, 2024.
Nakakuha og luna sa Olympics si Ceniza human nalangkat ang ikaupat nga puwesto sa World Cup diin nakarehistro siya og total lift 300kg gikan sa 132kg sa snatch ug 168kg sa clean and jerk.
Ang top 10 athletes sa World Cup mao ang mahatagan og puwesto sa Olympics, nga usa ka matag upat ka mga tuig nga kompetisyon. Sa kinatibuk-an, 10 na ka mga atleta sa Pilipinas ang nakasulod sa Paris Games. / ESL