Lain nga puya nga gituohang anaa sa 5-6 ka buwan ang nakit-an sa basurahan sa may Gabuya Street, Barangay Mambaling, Dakbayan sa Sugbo mga pasado alas 8 sa gabii sa Dominggo, Abril 13, 2025.
Ang Mambaling police nakadawat og tawag gikan sa usa ka garbage collector mga alas 9 sa gabii nga aduna sila'y nakit-an nga puya hinungdan nga dali nila kining girespondehan.
Sa pag-abot sa mga sakop sa Mambaling Police Station sa maong dapit inubanan sa Scene of the Crime Operatives (SOCO) 7 nga gipanguluhan ni Police Executive Master Sergeant Donaldo Jakosalem, ilang gikuha ang maong puya nga gisulod og transparent box nga wala nay kinabuhi.
Matod ni Melvin Ucab, garbage collector sa Metro Waste Solid Management Cebu Corporation nga nakugang siya nga sa dihang iyang giabrihan ang transparent box nga gibutang sa basurahan maoy nisugat sa iyang panan-aw ang puya nga gibanabana sa taga Cebu City Disaster Risk Reduction and Management Office o CCDRRMO nga anaa sa 5-6 ka buwan.
Sa pagkakaron, nagpahigayon pa sa ilang imbestigasyon ang kapulisan aron ilhon ang naglabay sa puya nga gidala na sa St. Francis Funeral Homes.
Niadtong Sabado sa buntag, Abril 12, 2025, usa ka bag-ong natawo nga bata’ng babaye nga gituohang gilabay sa iyang inahan ang napalgan nga naglutaw sa sapa nga wala nay kinabuhi sa Sitio Himumbongan, Barangay Cantuod, Lungsod sa Balamban. / Jane Kristine Gallardo