Magpadayon ang laing hugna sa rehabilitasyon sa Cebu City Sports Center (CCSC) nga maglakip sa multipurpose building, grandstand, ug swimming pool grandstand isip key areas sa proyekto.
Usa ka dokumento gikan sa opisyal nga website sa Cebu City nagpakita nga ang mga butang sama sa mobilization, excavation sa estruktura para sa ramp, concrete sa estruktura para sa ramp, pag-install sa rebars, acoustic panel wall, pagtangtang sa mga babag, plumbing works, pag-install sa collapsible stage, electrical works, pag-install sa mga pultahan ug bintana, ug pag-install sa pavers mao ang key inclusions sa rehabilitasyon alang sa multipurpose building.
Alang sa grandstand, adunay pag-re-install sa kisame, pag-install sa mga samin nga bintana ug pultahan, pintura, electrical works, fire protection works, CCTV system, pressure tank ug booster pump, falseworks, ug demobilization.
Adunay repainting works, tiling works para sa comfort rooms, plumbing fixtures, ug electrical works alang sa swimming pool grandstands.
Sa mga miaging report sa SunStar, ang Cebu City nagpaabot na sa stage preparations para sa pagbalik sa Pasigarbo sa Sugbo sa CCSC.
Si Cebu City Acting Mayor Raymond Alvin Garcia mipahibawo nga ang SBD Builders, ang kontraktor nga nagsugod sa pag-ayo sa CCSC track oval, maghimo og minor repairs hangtod sa Pasigarbo sa Sugbo, dayon ang track oval isira pag-usab ug ang kontraktor maghimo og major renovations human unya sa festival.
Ang ritwal nga showdown naka-schedule sa Agusto 25 ug ang awarding ceremonies ipahigayon sa sunod adlaw, Agusto 26.
Ang CCSC temporaryo nga gisira sugod sa Mayo 18, 2023 aron magpaandam alang sa rehabilitasyon human nga napili nga host sa national sporting event.
Nadaug sa Cebu City ang bidding rights sa pag-host sa Palarong Pambansa 2024 ug ang CCSC maoy pangunang sports venue para sa athletic events sa Palaro.
Human sa kapin sa usa ka tuig nga pagsira, ang CCSC giabli pag-usab niadtong Hunyo 27, atol sa pagsugod sa Palaro.
Samtang, sa pangutana alang sa mga komento bahin sa umaabot nga mga rehabilitasyon, si Councilor Joy Augustus Young, nga kaniadto nagdumala sa track oval preparation sa Palarong Pambansa sa 1994, nagdumili sa paghatag sa iyang komento sa dihang gitawgan niadtong Dominggo, Agusto 4.
“Nah, no comment na lang ko ana kay walay makabalo jud unsay mahitabo diha,” matod ni Young.
Pakyas ang SunStar Cebu sa pagkuha og habig ni Jovito Taborada, manager sa CCSC, ug Acting Mayor Garcia aron mangayo og dugang detalye bahin sa rehabilitasyon. / JPS