Laing miyembro sa Nadera gun-for-hire group ang nadakpan sa follow-up operation sa Inayawan Police Station sa udto sa Lunes, Marso 24, 2025, sa Paradise 3, Barangay Kinasang-an, Dakbayan sa Sugbo.
Ang mga nasikop giila nga silang Rostom Sanchez Sialana ug Kian Labitad nga pulos dunay mga kaso sa ilegal nga drugas.
Sila ang responsable sa pagpusil kang Rodolfo Bajardo Dumasig Jr. 42 anyos, pintor, nga residente ra usab sa maong lugar samtang nagduwa og computer.
Kauban sila ni Jerson Tapere kinsa maoy unang nadakpan uban ni Wilfredo Pologon Nadera, 23, taga Sityo Camagong, Barangay Lahug, giilang lider sa grupo, ug Mark Argiey Ebo, alyas Garan, 38, taga Sambag 2, sakop sa Gibo gun-for-hire group.
Kini sukwahi sa unang nigawas nga taho nga kadtong tulo ka lalaki nga nadakpan sa Siyudad sa Danao nga giingong gun runner maoy nahinganlan.
Kahinumdoman nga gipakita sa Police Regional Office (PRO) 7 ang tulo ka mga gun-for-hire nga sakop sa duha ka grupo nga giingong maoy molikidar sa mga drug personalities nga dunay dakong utang sa ilang amo.
Si Police Lieutenant Colonel Maria Theresa Macatangay, deputy city director for operation sa Cebu City Police Office, nibutyag nga kon wala pa madakpan ang duha nga konsabo sa mga hitman mahimong sila na usab ang mohulip.
Tungod sa ilang pagkasikop, dako ang pagtuo sa kapulisan nga mokunhod ang mga kaso sa pagpamusil sa Dakbayan sa Sugbo. Apan bisan pa niini nagpadayon ang kapulisan pag-ila sa laing miyembro sa maong grupo.
Kon basehan ang gun-for-hire matrix sa duha ka grupo, makita nga gawas niadtong mga nadakpan, duna pay laing mga gunman ang gipangita karon ug posibling dunay laing personalidad ang mohulip.
Gumikan niini, dili molugak ang kapulisan sa ilang anti-criminality campaign sama sa Oplan Bulabog ug paggukod niadtong mga naghupot og dili lisensyadong armas.
Duna nay gipanid-an ang CCPO nga maoy target sa sunod nila nga follow-up operation sa umaabot nga mga adlaw. / AYB