Lakers batok sa Pacers sa finals

FINALS: Yanong naka-layup si Los Angeles Lakers forward LeBron James (23) ning aktuha human niya nalutsan ang depensa ni New Orleans Pelicans forward Zion Williamson (1) sa ilang semis game sa In-Season Tournament sa NBA ning biyernes. Disyembre 8, 2023 (PH time) sa Las Vegas. Ningdominar ang Lakers ning duwaa aron pag-abante sa finals.
FINALS: Yanong naka-layup si Los Angeles Lakers forward LeBron James (23) ning aktuha human niya nalutsan ang depensa ni New Orleans Pelicans forward Zion Williamson (1) sa ilang semis game sa In-Season Tournament sa NBA ning biyernes. Disyembre 8, 2023 (PH time) sa Las Vegas. Ningdominar ang Lakers ning duwaa aron pag-abante sa finals. AP PHOTO

Nakaabante sa finals ang Los Angeles Lakers ug Indiana Pacers human nila gipangdispatsar ang ilang tagsa-tagsa ka kontra sa semi-final games sa 1st In-Season Tournament sa National Basketball Association (NBA) ning Biyernes, Disyembre 8, 2023 (PH time) sa Las Vegas, USA.

Ang Lakers ningmakmak sa New Orleans Pelicans, 133-89, sa Western Conference samtang ang Pacers ningkastigo sab sa Milwaukee Bucks, 128-119, sa Eastern Conference.

Balanseng ataki ang gihimo sa Lakers sa tibuok duwa sa ilang pagdominar sa Pelicans.

Nimugna og 30 puntos si LeBron James aron pangulohan ang Lakers, nga nakadawat sab og 17 puntos gikan ni Anthony Davis ug 16 puntos gikan ni Austin Reaves.

Aduna pay laing tulo ka mga magduduwa ang Lakers nga nakamugna og dobleng numero nga puntos.

Ang Pelicans gipangulohan ni Trey Murphy III pinaagi sa iyang 14 puntos, nitunol og 13 puntos si Zion Williamson samtang niamot og 10 puntos si Herbert Jones.

Naglabaw ang Pelicans human sa 1st quarter, 30-29, apan human niini, gimugna ni James ang nag-unang 11 puntos sa 2nd quarter ug nakontrolar na’g sugod sa Lakers ang duwa hangtod na sa katapusang gutlo.

Sa laing duwa, ang Pacers gipangulohan ni Tyrese Haliburton pinaagi sa iyang 27 puntos ug 15 ka assists, niamot og 26 puntos si Myles Turner samtang nitunol og 14 puntos si Obi Toppin.

“It’s our time!” singgit ni Haliburton human siya nakapasulod og threepoint shot sa hinapos nga bahin diin naseguro na sa Pacers ang kadaugan.

Ang Bucks gipangulohan ni Giannis Antetokounmpo pinaagi sa iyang 37 puntos ug 10 ka rebounds, nihatag og 24 puntos si Damian Lillard samtang nihatag og 20 puntos si Khris Middleton.

Ang tanang mga duwa sa In-Season Tournament apil sa kuwentada alang sa regular season.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph