Mipagawas sa ilang kamangtas ang duha ka dagko nga teams ang reigning champion Boston Celtics ug Los Angeles Lakers sa ilang managlahi nga duwa samtang nagkaduol na ang playoffs sa National Basketball Association (NBA) kagahapon, Abril 12 (PH time).
Gipakamang sa Los Angeles Lakers ang No. 2 team sa West nga Houston Rockets, 140-109, sa pagpangulo ni Luka Doncic nga mitali og 39 puntos, walo ka rebounds ug pito ka assists.
Tungod sa maong daog, nakuha na sa Lakers ang No. 3 seed para sa Western Conference playoffs.
Miamot si Austin Reaves og 23 puntos, samtang si James mihatag og 14 puntos sa wa pa kini molingkod sa uwahing 19 minutos sa duwa.
Nakuha sa Lakers ang Pacific Division title sa ikaduhang higayon sulod sa 13 ka seasons, ug midaog og 50 ka games sa ikaduhang higayon ra gihapon sulod sa 14 ka tuig.
Si Cam Whitmore mibuhat og career-high 34 puntos para sa Houston, kinsa nasigurado na ang No. 2 spot sa miaging semana.
Samtang didto sa Boston, nakuha sa Celtics ang ika-60 nga daog karon nga season human gipaig ang Hornets, 130-94.
Si Payton Pritchard miiskor og 22 ug mipuno si Sam Hauser og 20 para sa Celtics.
Midugang pud si Derrick White og 19 puntos, si Jayson Tatum miamot og 16 puntos, walo ka rebounds ug walo ka assists, samtang si Al Horford mitunol og 13 puntos ug 11 rebounds.
Wa makaduwa si Celtics star Jaylen Brown tungod sa sore right knee.
Sa history sa NBA ang Celtics ug Lakers maoy pinakadaghan og titulo; ang Celtics adunay 18 ug ang Lakers 17. / RSC