Nakatilaw og laing kapildihan ang Los Angeles Lakers sa mga kamot sa Golden State Warriors, 129-125, sa National Basketball Association (NBA) preseason game didto sa Crypto.com Arena sa Los Angeles, California.
Nahimong bida sa Warriors mao ang rookie nga si Trayce Jackson-Davis human niini napasulod ang go-ahead basket pinaagi sa tip-in sa nahabiling 32 segundos sa duwa, dayon gisundan og palak batok kang Jalen Hood-Schifino sa depensa nga maoy nakapatapos sa duwa.
Nakahimo ang superstar nga si Stephen Curry og 18 puntos sulod sa 21 minutos nga playing time para sa Warriors, samtang si Jonathan Kuminga nipaig sa Lakers gamit ang iyang 26 puntos gikan sa 9-of-12 shooting sa three-point line.
Si Brandin Podziemski, ang 19th overall pick karong tuiga, adunay 10 puntos, 10 ka assists ug unom ka rebounds.
Ang beterano nga si Lebron James mimarka og 12 puntos ug lima ka assists. Ang highest scorer sa Lakers mao si Taurean Prince nga adunay 17 puntos, mitunol og 16 puntos si Austin Reaves samtang si Anthony Davis adunay 13 puntos, unom ka rebounds ug upat ka assists.
Mao kini ang ikaduhang pilde sa Lakers batok sa Warriors sa preseason. Gikastigo sa Warriors and Lakers sa ilang unang panagbagat, 125-108, sa miaging semana.
Ang Warriors adunay 2-0 record samtang ang Lakers naghupot og 2-2 nga baraha.