Nakaseguro na og puwesto sa playoffs ang host Los Angeles Lakers human nila gipanglampornas ang Cleveland Cavaliers, 127-113, kagahapon, Miyerkules, Abril 1, 2026 (PH time), sa National Basketball Association (NBA).
Ang Lakers, nga nagpabilin sa ikatulong puwesto sa Western Conference dala ang 50-26 nga rekord, mao ang ikaupat nga team sa West nga nakaseguro na’g puwesto sa playoffs.
Ang laing tulo mao ang overall leader ug defending champion Oklahoma Cit Thunder (60-16), San Antonio Spurs (57-18), ug Denver Nuggets (48-28).
Bisan wala sila’y duwa kagahapon, nakasulod gihapon sa playoffs ang Nuggets human napilde ang laing West team Phoenix Suns batok sa East squad Orlando Magic, 111-115.
Si Luka Doncic, kinsa gikan sa usa ka duwa nga suspensyon, namungot og maayo ug nimugna kini og 42 puntos ug 12 assists aron pangulohan ang Lakers.
Mao kini ang ika-16 nga duwa sa kasamtangang season nga nakamugna si Doncic og 40 puntos o labaw pa.
Nidugang og 19 puntos si Austin Reaves alang sa Lakers, niamot og 18 puntos si DeAndre Ayton samtang ningtampo og 14 puntos matag usa sila si LeBron James, Jake LaRavia ug Rui Hachimura.
Taliwala sa kapildihan, ang Cavaliers nagpabilin sa ikaupat nga luna sa East dala ang 47-29 nga rekord.
Hayag man tuod gihapon ang purohan sa Cavaliers nga makaderetso sa playoffs nga dili na moagi sa Play-in tournament apan posible pa silang magukdan kon dili maayo ang mga resulta sa nahabilin nilang unom ka mga duwa sa regular season.
Ang Cavaliers gipangulohan ni Jarrett Allen pinaagi sa iyang 18 puntos samtang nidugang og 17 puntos si James Harden.
Mao kini ang labing unang pagduwa ni Harden sa Cavaliers gikan niadtong multi-player trade niadtong Pebrero 3, nga naghatod kang Darius Garland ngadto sa Los Angeles Clippers. / Gikan sa wires