Napalgan ang lawas sa usa ka lalaki nga adunay samad sa ulo sa alas 5:30 sa buntag, Huwebes, Marso 6, 2025, sa Sitio Margo, Barangay Sudlon 1, bukirang bahin sa Siyudad sa Sugbo.
Walay nakaila nga mga residente sa maong lalaki nga gituohan nga gipatay sa dapit diin napalgan kay init pa ang lawas niini sa dihang namatikdan nga nagbuy-od sa kasagbutan.
Sigon sa barangay tanod sa Sudlon 1 nga si Joseph Bantilan nga usa ka jogger maoy unang nakabantay sa maong patay nga lawas.
Sa pasiunang imbestigasyon sa kapulisan nga adunay nakadungog og duha ka buto nianang kaadlawon apan wala lang kini panumbalinga.
“Diha sa ubos sir mga tawo diha, naa daw silay nadunggan nga buto wala sad sila mo-confirm kon buto ba sa armas ang ilang nadungog basta nakadungog kuno sila og buto anang mga alas 5 sa buntag. Duha kuno ka buto ang ilang nadunggan,” matod ni Bantilan.
Ang maong lalaki gibanabana nga anaa sa kapin sa 50 ang pangedaron ug nagsul-ob og yellow t-shirt ug brown camouflage nga short pants.
TAGA-‘TALISAY’
Usa sa mga residente sa Barangay Lagtang, Talisay City ang nitawag sa DyHP RMN Cebu nga nakaila siya sa patay nga lawas nga napalgan sa Sudlon 1.
Matod sa nanawag nga dili lang magpaila nga ilang silingan ang maong biktima nga taga Sitio Ilang-Ilang Barangay Lagtang nga nailhan niya sa angga nga si Dong Jen.
Sinati niya ang gisul-ob nga t-shirt sa biktima lakip na ang panagway niini nga tungod ani ang mga kabanay nisusi na punerarya. / AYB
