Usa ka subo nga palandungon nga may gihaya sa usa ka panimalay sa pagsugat sa Bag-ong Tuig 2024 sa dihang usa ka sakop sa pamilya ang gipusil-patay.
Usa ka lanog nga buto sa armas ang nipukaw sa mga lumolupyo sa Brgy. Vito, lungsod sa Balamban, alas 4:00 sa kaadlawon, Dominggo, Disyembre 31, 2023.
Kini ang gibutyag ni Police Lt. Col. Joey Bicoy nga gikahinabi sa Superbalita Cebu.
Matod niya, ang mga lumolupyo sa maong dapit nakamata tungod sa buto-buto ug nakamatikod nga may usa ka motorsiklo nga daling nisibat sa maong lugar.
Sa pagsusi sa mga molupyo, dihay usa ka tawo nga nagbuy-od na sa karsada nga may samad pinusilan sa nagkadaiyang bahin sa lawas niini hinungdan nga ilang gi-report ngadto sa kapulisan.
Matod ni Bicoy, sa ilang imbestigasyon uban sa Scene of the Crime Operatives (Soco) nailhan ang biktima nga si Manuelito Madrig Capablanca, hamtong ang panuigon, usa ka construction worker, taga Sityo Pilit, Brgy. Nangka, Balamban.
Gibutyag ni Bicoy nga ilang nasayran nga ang biktima sugarol apan subayonon pa kon kinsa ang mipatay niini ug unsa ang motibo sa krimen.
Ilang gituohan nga ang biktima gisakay sa motorsiklo ug pag-abot sa awa-aw nga bahin sa karsada sa Vito, Balamban, gipusil-patay kini.