Gideklarar nga dead on arrival (DOA) sa ospital ang 55 anyos nga lalaki human gipusil sud sa iyang balay sa Sityo Bahada, Barangay Tabunok, siyudad sa Talisay, alas 7:11 sa gabii sa Martes, Disyembre 26, 2023.
Ang biktima giila nga si Hermogenes Reyes, minyo, samtang ang batan-ong suspek giila nga si “Joseph”, mamaligyaay og bingka, ilang silingan.
Sa pasiunang imbestigasyon sa kapulisan sa dakbayan sa Talisay ubos sa kamandoan sa ilang hepe nga si Police Lt. Col. Wayne Magbanua, ang suspek nisulod sa panimalay sa biktima ug dayon namusil.
Ang biktima nga naigo sa dughan daling gidala sa iyang pamilya sa ospital apan gideklarar nga patay nang niabot.
Sa taho sa GMA 7 Balitang Bisdak, si Reyes nakasulti pa sa iyang asawa kinsa ang nipusil kaniya.
Ang tibuok hitabo nakuhaan og footage sa closed circuit television (CCTV) camera.
Matod sa samang taho, ang suspek nga nagtaptap sa baba nisulod sa gate samtang si Reyes nagbuak og lubi nga kaguron ug nagtalikod.
Naniid pa ang suspek nga nagbitbit og balde dayon nipusil makausa sa biktima una nisibat.
Nakabarog pa ang biktima ug nilabay og sundang sa suspek nga wa maigo.
Gituohan nga “personal grudge” ang motibo kay ang suspek giingong utangan og P3,000 sa biktima.
Kanunay kini paninglan sa biktima kay ila kining suki sa pagkagod og lubi.