Nalandig sa tambalanan ang usa ka lalaki nga biktima sa pagpamusil sa Sityo Minggay, Barangay Bulasa, lungsod sa Argao, alas 8:00 sa gabii sa Miyerkules, Enero 24, 2025.
Ang biktima giila nga si Charlie Naces, hamtong, minyo, taga Sityo Minggaw, Brgy. Bulasa, Argao, naigo sa liog sa bala sa 9mm pistol.
Samtang ang suspek nga nasikop sa kapulisan giila nga si Florentino Caminade Jr., 54, minyo, taga Sityo Proper Linao, Barangay Bulasa.
Sa pakisusi sa Superbalita Cebu sa pasiunang imbestigasyon sa kapulisan sa Argao ubos sa kamandoan sa ilang hepe nga si Police Maj. Ivy M. Bartolome, ang biktima diha su’d sa iyang balay apan gisulong sa suspek.
Matod pa sa dihang nigawas ang biktima sa balay, gipusil kini sa suspek sa upat ka higayon. Usa ka bala niigo sa liog sa biktima.
Ang biktima gidali pagdala sa mga responder sa Lungsod sa Argao ngadto sa Bogo Argao District Hospital.
Ang suspek daling nadakpan sa mga polis sa ilang hot pursuit.
Atol ning pagsuwat, padayon pa ang imbestigasyon sa kapulisan kon unsay gikabangian sa duha nga nisangko sa pagpamusil.