Patay ang usa ka 43 anyos nga lalaki human pusila atubangan sa iyang kaipon, ala 1:29 sa Lunes sa kaadlawon, Hunyo 10, 2024, sa Sitio Wakwak, Block 1, Barangay Suba, Siyudad sa Sugbo.
Ang biktima giila sa iyang kapuyo nga si Frederick Maitim Mejares, 43, lumolupyo ra usab sa lugar.
Sa imbestigasyon sa Sawang Calero Police Station, nasayran nga samtang nag-estoryahanay ang biktima ug iyang kaipon, kalit lang nga niabot ang tulo ka mga lalaki.
Usa niini nga naka-pajama ug nag-itom og t-shirt maoy nipusil sa biktima.
Nakadagan pa si Mejares apan giusban sa pagpusil ug naigo sa likod sa lawas hinungdan sa iyang pagkahagba.
Dali nga nanawag og medical team ang mga residente sa dapit apan gideklarar nga dead on arrival (DOA).
Ang kapulisan padayon sa ilang imbestigasyon labot sa insidente. / AYB