Patay nang nakaplagan ang usa ka lalaki sa Zone 4 Saac 1, Barangay Buaya, siyudad sa Lapu-Lapu, alas 5 sa buntag sa Miyerkules, Disyembre 13, 2023.
Ang biktima giila nga si Nestor Fortuna Caspillo Jr., ulitawo, taga Zone 6, Brgy. Buaya, Lapu-Lapu City.
Ang biktima dunay samad nga pinusilan sa ulo.
Sa interview sa Superbalita Cebu kang Police Maj. Dexter Basergo, hepe sa kapulisan sa Lapu-Lapu City Police Station, ang biktima napalgan nga layo ra sa ilang pinuy-anan apan duol sa balay sa giingon nga iyang uyab.
Matod ni Basergo, nagpadayon pa ang ilang imbestigasyon kon nganong naabot ang biktima sa lugar, background niini ug kinsa ang responsable sa pagpatay, lakip sa motibo niini.
Dugang sa kapulisan, ang amahan sa biktima nagkanayon nga wala siyay nasayran nga dunay kontra ang iyang anak.
Kini ang hinungdan nga palawman pa sa kapulisan ang imbestigasyon.
Ang patay nga lawas sa biktima gipaubos sa autopsy.