PATAY na nga nadangat sa tambalanan sa Dakbayan sa Sugbo ang usa ka lalaki human pusila sa wala pa mailhing mamuno sa ala 1:50 sa kaadlawon, Lunes, Hulyo 21, 2025, sa Sitio Anagan, Barangay Apas, Dakbayan sa Sugbo.
Ang biktima giila nga si Clark Licong, 40, residente sa maong lugar.
Sa pasiunang imbestigasyon sa Mabolo Police Station nga samtang naglingkod ang biktima sa kilid sa karsada sa maong dapit, kalit lang naabot ang suspetsado nga nagmotorsiklo ug naka-bonnet dayong pusil sa biktima tumong sa ulo.
Dali nga nisibat ang suspetsado, samtang gidala ang biktima sa Cebu City Medical Center apan gideklara nga dead on arrival sa mga doktor.
Adunay CCTV camera sa lugar apan subayon pa kini sa mga sakop sa Mabolo Police Station kon na-capture ba niini ang maong insidente. Giingong nag-abang og balay ang biktima sa dapit ug duna kini ka live-in apan matod pa nagbuwag na sila. / AYB