Patay nang nalandig sa tambalanan human gipusil ang usa ka lalaki nga nagsayaw sud sa diskuhan sa covered court atol sa piyesta sa Barangay Bitoon, lungsod sa Dumanjug, alas 3:04 sa kaadlawon sa Lunes, Abril 15, 2024.
Ang biktima giila nga si Josephus Davis Castillo, 29, ulitawo, may kapuyo, laborer, taga Barangay Salagmaya, lungsod sa Alcantara.
Atol ning pagsuwat, wa pa mailhi ang mamumuno ug motibo sa pagpatay.
Base sa imbestigasyon sa kapulisan sa Dumanjug Police Station nga ubos sa kamandoan sa ilang hepe nga si P/Capt. Jan Ace Elcid P. Layug, ang biktima kada piyesta moanha sa maong dapit aron mangusinero sa iyang iyaan sa Barangay Bitoon nga magpakumbira kada Abril 14.
Matod pa nga ang biktima nagsayawsayaw lang apan giduol sa wa mailhing tawo ug gidul-itan sa pagpusil sa gunman ang iyang liog sa wa pa masayri nga kalibre sa armas.
Matod pa may nakakita sa pagpamusil kay naa pay mga tawo nga nahibilin nga nagdisko apan pulos wa makaila sa mamumuno hinungdan sa pagtuo nga dayo ang gunman sa barangay.
Ang biktima gikataho nga way kontra sa maong dapit hinungdan nga padayon pa ang imbestigasyon sa kapulisan aron pagtino unsa gyud ang motibo.
Samtang, gisusi usab ang background sa biktima sa ilang dapit sa Alcantara. / DVG