GISUSI: Ang kapulisan misusi sa nahitabuang dapit sa pagpamusil-patay sa Sitio Lower Badiang, Barangay Toong nga bukirang dapit sa dakbayan sa Sugbo. / ARNOLD Y. BUSTAMANTE
GISUSI: Ang kapulisan misusi sa nahitabuang dapit sa pagpamusil-patay sa Sitio Lower Badiang, Barangay Toong nga bukirang dapit sa dakbayan sa Sugbo. / ARNOLD Y. BUSTAMANTE

Lalaki gipusil sa iyang gikasukmagay, patay

Namatay ang usa ka 33 anyos nga lalaki human pusila sa iyang silingan nga iyang gikasumagay sa Sitio Lower Badiang, Barangay Toong, bukirang dapit sa dakbayan sa Sugbo, alas 9:40 sa buntag sa Lunes, Marso 18, 2024.

Ang biktima giila nga si Christopher Plarisan, 33, samtang ang giila sa mga saksi nga suspek mao si Judie Bacalso, hingkod, taga Sitio Bu-ad, Toong.

Matod ni Police Major Eraño Regidor, hepe sa Labangon Police Station nga niadtong Dominggo, Marso 17, 2024, nagkaaway ang biktima ug suspek sa usa ka tigbakayan ug pulos nakainom.

Nauwang ra sila sa ilang mga silingan apan kagahapon sa buntag, sa dihang nakamata ang suspek, nibalik kini sa Sitio Lower Badiang ug gipangita si Plarisan.

Sa dihang iyang nakit-an, iya kining gipusil tumong sa agtang nga niresulta sa hinanali nga kamatayon sa biktima.

Duha ka mga kabhang sa bala sa kalibre .45 nga pistola ang nakuha sa mga imbestigador sa Labangon police ug Scene of the Crime Operation (Soco).

“Kining biktima naa ni kaso nga rape ug murder nya kining suspetsado naay kaso nga murder. Gahapon (Dominggo, March 17, 2024) didto nagsabong sila, nagkalalis nya nagka sinumbagay. Nya ganinang buntag nahuwasan na, mibalik kadtong suspect, gipusil ang agtang, patay,” asoy ni Regidor.

Sa pagsuwat ning taho, wa pa madakpi ang suspek.

Related Stories

No stories found.
SunStar Publishing Inc.
www.sunstar.com.ph