NAMATAY ang 34-anyos nga lalaki human gitigbas sa iyang silingan nga iyang gikabangi sa alas 6:30 sa gabii, Dominggo, Hunyo 29, 2025, sa Proper 1, Brgy. Tomonoy, Lungsod sa Moalboal.
Ang biktima nga si Edelberto Taborada, dunay kapuyo, manglitsonay sa lugar, nakabaton og samad sa iyang duha ka kamot og liog nga niresulta sa iyang hinanaling kamatayon.
Ang suspek nga si Leoncio Gako Cataylo, 63, minyo, mananagat, nitahan ra sab sa mga awtoridad human sa hitabo.
Matod ni Police Lt. Paul Vaughn Sumiller, deputy chief sa Moalboal Police Station, nga hubog ang biktima dihang nahitabo ang krimen.
Gibutyag niini nga karaang panagbangi sa biktima ug suspek ang hinungdan.
Ang ilang panagbangi nag-su-god niadtong bulan sa Abril sa dihang nakasulod sa koral sa panimalay sa suspek ang binuhing kanding sa biktima ug gipangaon ang mga tanom niini.
Sumala pa sa suspek nga niadtong Dominggo, naabot ang biktima nga hubog unya nagsige og siyagit-siyagit nga nagkanayon nga “usa ka bala lang ka.”
Kini maoy ikatulong higayon nga nagsinggit-singgit ang biktima kon mahubog.
Samtang nagbarog ang suspek diha sa atubangan sa ilang panimalay, matod pa nga gilabay siya og bato sa biktima.
Tungod niini, iyang gitigbas ang liog sa biktima apan nakadagan hinungdan nga iya kining gigukod og gitigbas ang tuong kamot nga naputol.
Gitigbas sab niya ang walang kamot niini nga nagkawil-kawil.
Dayon gitiwasan niya sa pagtigbas ang liog hangtod nga namatay.
Human sa hitabo, nitahan ang suspek sa barangay kapitan, kinsa ni-turnover kaniya sa niresponde nga kapulisan.
Narekober sa kapulisan ang sundang nga gigamit sa suspek nga adunay gitas-on nga duha ka tiil. / GPL