Patay nang nadiskubrehan ang usa ka lalaking gibanabanang nagpangedaron og 40 anyos nga taga Siyudad sa Danao, Sugbo nga may samad pinusilan sa iyang ulo sa bakanteng luna sa Barangay Pajac sa Siyudad sa Lapu-Lapu sa alas 7:50 sa gabii, Marso 2, 2025.
Matod ni Lt. Col. Christian Torres, ang tigpamaba sa Lapu-Lapu City Police Office nga samtang nagpahigayon sila sa Comelec checkpoint sa Pajac rotonda, nakadawat sila og taho mahitungod sa nakit-ang patay nga tawo sa maong dapit.
Ang mirespondeng kapulisan nagtuo nga bag-o pang gipusil ang biktima.
Sigon ni Torres nga aduna na silay tulo ka persons of interest nga ilang gisubay human kini nakit-an nga naglakaw sa dalan diin napalgan ang patay nga lawas sa maong biktima kinsa padayon pa nga giila sa kapulisan ug ang background niini kon wala ba malambigit sa pagpamaligya og ilegal nga drugas.
Nasayran nga usa ka laborer sa rattan factory sa Danao ang biktima.
Sutaon usab sa kapulisan kon nganong naabot ang biktima sa Siyudad sa Lapu-Lapu sanglit taga Danao man kini. / DVG