Lalaki miduwa sa iyang private part; gibidyuhan
Nag-viral sa social media ang video sa usa ka lalaki nga nagduwa sa pribadong bahin sa iyang lawas sa sulod sa food court sa usa ka mall sa Dalan Natalio Bacalso ug Lion Kilat, Dakbayan sa Sugbo, Martes, Mayo 21, 2024, alas 4:45 sa hapon.
Ang iyang gibuhat nakuhaan og video sa usa sa mga babaye nga nakakita ug gi-upload sa amahan niini.
Si Inday May, tinun-an sa usa ka tunghaan duol sa mall, nibutyag nga pasado alas 4 sa hapon uban sila sa iyang mga classmate nga nagpa-clearance sa tunghaan. Tungod kay gigutom, nakahukom sila nga sa dili pa mamauli, mangaon lang una sa food court sa mall.
Sa ilang paglingkod, nabantayan ni Inday May ang lalaki sa iyang atbang nga nagsige og tan-aw niya. Pipila ka gutlo ang milabay, nagpadayon ang pagtutok sa maong lalaki kaniya nga naghawid sa iyang cellphone.
Dako na lang ang ilang kakurat nga ang lalaki nagduwa na sa iyang private part.
Dali siya nga nikuha sa iyang cellphone ug iyang gi-video ang gihimo sa maong tawo ug gisumbong unta sa gwardiya apan dali nga nibarog ug nidagan pahilayo.
Gisumbong ni Inday May sa iyang amahan ang nahitabo atol sa iyang pag-uli sa ilang balay.
Iyang gipahibawo nga nakuhaan niya ni og video ug ang amahan maoy ni-upload sa Facebook account niini nga nakaani dayon og pagtagad sa netizens.
Tungod niini, ang kapulisan sa Dakbayan sa Sugbo mohimo sa ilang imbestigasyon labot sa pagbinastos sa lalaki.
Matod ni Police Major Philip Libres, hepe sa Carbon Police Station, nga iyang ipasubay sa ilang imbestigador kon kinsa ang maong lalaki.
Nakig-alayon na usab sila sa tinun-an nga biktima uban sa mga ginikanan niini aron sa pagsang-at og pormal nga reklamo.
Duha ka mga kaso ang posibling atubangon sa maong lalaki kon mailhan na, kini mao ang unjust vexation ug ang bag-ong balaod nga Safe Spaces Act kun Bawal Bastos Law.
“Naka view na ta sa video mao to ako gipaadto ang atong imbestigador aron pagkuha sa dugang ebidensya. Labina ang mga CCTV noh. Naa man nay mga CCTV diha para ma identify pud nato ang suspect, katong nagbuhat sa law-ay nga bulohaton. Ato sad siya nga ma profiling ug ma background,” matod ni Libres.
Sa pagkutlo ning balita, wala pa mailhi kinsa ang maong lalaki nga nag viral sa social media.
Apan nanawagan si Libres sa mga tawo nga nakamay-ong sa dagway niini nga makig-alayon sa kapulisan.
Base sa video maklaro ang panagway sa suspek.
Gani daghan ang naka- screenshots sa dagway sa nawong niini ug dili na lisod sa kapulisan ang pag-ila, dason ni Libres.
Niawhag usab siya sa maong lalaki nga labing maayo nga motahan na lang sanglit madugay o sa madali mailhan ra gihapon siya.
Awhag sa kapulisan sa publiko nga kon makasugat og ingon niini nga sitwasyon, itaho dayon sa kapulisan aron mahatagan gilayon nila sa dinalian nga pagtagad. / AYB