Kon ang tawo ug bitin nga di venomous magpinaakay, kinsa kaha ang mamatay? Sagad ang tawo, di ba?
Apan niay talagsaon kaayo’ng hitabo sa lalawigan sa Bohol ning semanaha.
Gikompirmar sa imbestigador sa Antequera Municipal Police Station nga si Police Staff Sgt. Andy Calcaben ang nag-viral sa social media post bahin sa usa ka tawo nga nakigpinaakay tali sa usa ka bitin nga Baksan kun reticulated python.
Kini nahitabo sa Barangay Quinapon-an sa lungsod sa alas 2 sa kaadlawon sa Martes, Disyembre 19, 2023.
Si Calcaben nibutyag sa pakighinabi sa Superbalita Cebu sa Huwebes, Disyembre 21, pinaagi sa telepuno, nga tinuod ang na-post sa social media nga usa ka Boljulio Aleria, 48, taga Cabayugan, Calape, Bohol, ang nalandig Governor Celestino Gallares Memorial Hospital sa siyudad sa Tagbilaran human napaakan og bitin ang iyang tuo nga bukton, apan ang halas iya usab nga gipaak hangtod namatay.
Matod ni Calcaben, si Aleria nagmaniho sa iyang motorsiklo pauli sa dapit sa Calape, alas 2 sa kaadlawon sa maong adlaw.
Apan sa kalit lang, nahunong siya sa dihang may nag-ali nga dako’ng bitin nga Baksan sa karsada hinungdan nga gipaabot niya nga mokamang daplin sa dan.
Apan sa kalit lang, nituyhakaw ang bitin ug dayon nitundok sa iyang tuo’ng bukton ug nibalikos kaniya.
Ang biktima natumba dulog sa iyang motorsiklo, apan wa matarantar si Aleria, iya usab nga gipaak ang bitin sa tangkugo nga diriyot maputol.
Didto na siya malugaki sa pagbalikos kaniya.
Si Aleria nakapanampit og tabang sa mga lumolupyo sa maong dapit mao nga nadala sa tambalanan.
Ang reticulated python walay hilo apan kusgan kini kaayo, mopatay sa iyang biktimahon pinaagi sa paglikos ug pagtuok hangtod nga mamatay.