Usa ka batan-ong lalaki nga giingon’g nagumon sa ilegal nga drugas ang napusasan human niya gisuwayan og sunog ang ilang panimalay alas 6 sa gabii sa Sabado, Mayo 24, 2025, sa may Seaside Alumnos, Barangay Basak San Nicolas, Dakbayan sa Sugbo.
Si alyas Christian, 21, ulitawo nga nagpuyo sa nahisgutang lugar, gitanggong na sa Mambaling Police Station samtang giandam ang kasong arson batok kaniya.
Sa imbestigasyon sa kapulisan, nasayran nga ang suspek gidakop sa iyang mga silingan ug kabanay human niya giduslitan og lighter ang karton gawas sa ilang panimalay.
Daling niulbo ang kayo kay iyang gibutangan og panapton sa mga kurtina.
Ang mga silingan nga nakakita dali nga nagtinabangay sa pagsikop sa suspek nga ilang gi-turnover sa Mambaling Police Station.
Si Christian nibutyag nga adunay ‘demonyo’ nga nihunghong kaniya nga sunogon ilang panimalay kay matod pa testingan ang iyang power.
Ang dinakpan nagsige og yawyaw atol sa insidente.
Nahibaw-an sa kapulisan nga gipalayas na siya sa ilang panimalay tungod kay naadik sa bisyo sa drugas.
Kini maoy ikaduhang higayon karong tuiga nga gisuwayan pagsunog sa suspek ilang panimalay.
Ang suspek nadakpan na niadtong tuig 2023 tungod sa kasong grave threat. / GPL