GIPASAKAAN na og kasong four counts sa frustrated murder ang responsable niadtong pagpamusil sa upat ka indibidwal sud sa diskohan sa may Barangay San Roque, dakbayan sa Talisay.
Kini maoy gipahibawo ni Police Lieutenant Colonel Atty. Maila Maramag, hepe sa Talisay City Police Station, human nga nailhan nila ang maong lalaki sa ilang gipahigayon nga imbestigasyon diin nasayran nga naglambigit usab kini sa ilegal nga drugas.
Giila lang sa mga kapulisan ang suspek nga si alyas Bobby, notado nga gun for hire nga giingon’g suspek usab sa mga pagpamusil nga nahitabo sa tri-city—Lapu-Lapu, Mandaue ug Cebu City.
“Ang atong suspek ani is kanang gun for hire ni siya. He is also the suspect of many shooting incidents pud sa tri-cities,” asoy ni Maramag.
Midugang si Maramag nga nagpadayon gihapon ang ilang hot pursuit operation aron dakpon ang maong suspek.
Samtang gibutyag usab sa hepe nga ang upat ka mga biktima nakagawas na kini sa tambalanan ug anaa na sa luwas nga kahimtang.
Kahinumdoman nga niadtong Agusto 3 mga alas 12 pasado sa tungang gabii, niresponde ang kapulisan sa Talisay nunot sa taho nga dunay namusil sa nahisgutang lugar nga miresulta sa pagkaangol sa upat ka indibidwal lakip ang usa ka menor de edad nga ulitawo.
Matud pa nga niadto didto ang suspek kay iyang gipangita ang utangan niya sa ilegal nga drugas, apan tungod kay wala niya kini makit-i, namusil nalang sud sa diskohan ug nisibat pagka-human. / JDG