Nailhan na ang lalaki nga napalgang patay nga naglutaw sa kadagatan sa Sitio Santa Maria, Barangay Pusok, dakbayan sa Lapu-Lapu, mga alas 8 sa buntag niadtong Sabado, Disyembre 30, 2023.
Si Emelyn Legarde Wenceslao nibarug sa pag-ila sa namatay nga iya kining igsuon nga si Arman Legarde, 35, usa ka production worker, residente sa Barangay Tingub, dakbayan sa Mandaue, apan lumad nga taga lungsod sa Aurora, Zamboanga Del Sur.
Niadtong Martes, Enero 2, gikuha ni Wenceslao ang lawas sa iyang igsuon gikan sa usa ka punerarya.
Nasayran sa mga personahe sa Lapu-Lapu Police Station 5 ubos sa kamandoan ni Major Dexter Basergo gikan kang Wenceslao atol sa pakisusi nga ang biktima miadto sa iyang panimalay sa Sityo San Roque, Barangay Pusok, diin nag-inom kini og ilimnong makahubog.
Gidala ni Wenceslao si Legarde sa iyang balay sa Barangay Tingub, dakbayan sa Mandaue, dihang nahubog, apan wala mopauli ang naulahi.
Gitug-an ni Wenceslao nga mao na kadto ang katapusang higayon nga iyang nakit-an ang iyang igsuon ug wala na siya masayod sa nahitabo human niadto.