Lalaki nga perming gialarma sa Mabolo Police Sation sa kaso sa pagpamusil ilang nadakpan human gi report nga armado alas 12:30 sa Sabado sa kaadlawon, Abril 27, 2024 sa sulod sa Chinese Cemetery sa Barangay Carreta, dakbayan sa Sugbo.
Ang suspek giila nga si Roy Mojaro Monleon, alyas Roy-Roy, 25, lumolupyo sa dapit.
Nakuha sa mga polis ang usa ka 9mm nga pistol nga dunay siyam ka mga bala sa magazine niini ug mga pinakete sa gituohang shabu nga motimbang og 15 gramos nga dunay standard drug price nga P102,000.
Matod ni Police Major Romeo Caacoy Jr., ang hepe sa Mabolo Police Station, nga dunay nakatawag sa ilang buhatan labot sa presensya sa armado nga tawo.
Dali nga niresponde ang mga polis ug ilang naabtan si Monleon nga dala ang armas.
Sa ilang pag rekisa didto nakuha ang mga putos sa gituohang shabu nga naa na sa PNP Regional Forensic Unit 7 alang sa chemical analysis.
Permi usab ni nga ialarma sa mga polis sa Mabolo sa kaso sa pagpamusil diin ang labing uwahi nahitabo sa Miyerkules, Abril 24, 2024.
Dugang ni Caacoy nga ang kanunay nga pusilon sa suspek mao kadtong mga nalambigit usab sa ilegal nga drugas nga karibal sa iyang negosyo.
Tungod sa pagkasikop, daghang mga kaso ang masulbad niini, matod ni Caacoy.
Gitakda siya nga pasakaan og kaso sa Lunes, Abril 29, 2024. / AYB