Napusasan ang kanhi call center agent human gihimong “punching bag” ang kapuyo niini alas 8:10 sa buntag sa Dominggo, Marso 16, 2025, sa Villa Kalubihan, Barangay Basak San Nicolas, Dakbayan sa Sugbo.
Ang 27 anyos nga biktima nga si alyas Angel, nakaangkon og mga bun-og sa nagkadaiyang parte sa kalawasan.
Ang iyang 44 anyos nga kapuyo nga si alyas John Paul, kanhi call center agent, kasamtangang gitanggong sa Mambaling Police Station.
Gikatakdang ipasaka ang kasong kalapasan sa Republic Act 9262 o Anti-Violence Against Women and Children karong adlawa, Marso 18, 2025, batok ni John Paul.
Si Police Staff Sergeant Marivic Cañizares sa Women and Children’s Protection Desk (WCPD) sa Mambaling Police Station nga nahinabi sa Superbalita Cebu niingon nga nagmulo sa sakit sa iyang kilid si Angel kay gipatiran ug gisumbag.
“Nagmulo ang biktima sa kasakit sa kilid human gipatidpatiran! Misang-at gyud siyag reklamo aning kapuyo,” dugang ni Cañizares.
Matod ni Cañizares nga nagselos si John Paul hinungdan sa ilang panaglalis nga niresulta sa pagpanagmal.
Giingong nagduda ang kanhi call center agent nga naay laing gikabuangan ang iyang kapuyo.
Gipadayag niini nga gisusamag punching bag ni John Paul ang iyang kapuyo.
Dugang ni Cañizares nga makumpleto na ang dokumento karong adlawa, Martes ug ila nang ipasaka ang kaso batok sa lalaki.
Sumala pa niini nga nag-abang og lawak ang suspek ug biktima sa lugar.
Dihang nagkagubot, nabalaka ang mga residente sa dapit ug ni-report sa barangay hall.
Ang mga mirespondeng tanod maoy nidakop ug ni-turnover sa suspek sa kapulisan. / GPL