NAKAANGKON og samad-pinusilan ang usa 33-anyos nga manghod human siya gipusil sa iyang maguwang tungod sa panaglalis sa Sitio Kapasad, Barangay Dumlog, Dakbayan sa Toledo, Sugbo mga alas 9:00 pasado sa buntag, Hunyo 23, 2025.
Ang biktima nga anaa sa tambalanan nailhan nga si Erenio Tanajora, adunay live-in partner samtang ang suspek mao si Jerwin, 37, pulos nagpuyo sa nahisgutang lugar.
Subay sa imbestigasyon sa Toledo Police, ang biktima ug ang iyang live-in partner init nga nagkalalis tungod sa giingong ‘password’ sa cellphone.
Dihang nakadungog ang suspek sa panag-away, namadlong siya apan giingong nasuko ang biktima hinungdan nga iyang gigukod iyang maguwang og hinagiban.
Tungod sa kakuyaw sa suspek ug nakapainit sa iyang ulo ang gibuhat sa iyang manghod, nikuha siya og armas dayon pusil sa biktima nga niresulta sa pagkaigo sa buko-buko.
Daling nisibat ang suspek samtang ang biktima padayon nga nagpaalim sa tambalanan.
Nipahigayon na og hot pursuit operation ang kapulisan sa Toledo alang sa posibleng pagsikop sa suspek. / JDG