Nahabwa ang tinai sa usa ka drayber sa habalhabal human dunggaba og buwang sa iyang silingan sa Barangay Patong, lungsod sa Badian, alas 9 sa Miyerkules sa gabii, Pebrero 21, 2024.
Atol ning pagsuwat, ang biktima nga si Esmiraldo Requina Inilog, 40, ulitawo, nagpuyo sa naasoy nga lugar, kritikal ang kahimtang. Ang suspek nga nasikop sa kapulisan giila nga si Arnold Silvano Bismanos, 32, minyo, silingan.
Sa imbestigasyon sa kapulisan, ang biktima ug suspek nagtagay sa ilimnong makahubog uban sa ilang mga higala. Dihang nangahubog, nagkalalis ang duha bahin sa manok igtatari.
Ang suspek nga nasuko, nikuha og buwang ug gidunggab niya ang tiyan sa biktima.
Ang biktima gidali sa pagdala sa iyang mga kabanay sa Isidro C. Kintanar Memorial Hospital sa lungsod sa Argao. Ang suspek nadakpan sa follow up operation sa kapulisan.