GIPASIDUNGGAN sa Department of Agriculture – Regional Field Office (DA-RFO) 7) ang Lamac Multi-Purpose Cooperative (LMPC) atol sa usa ka seremonyas sa pag-ila sa Golden Prince Hotel and Suites, Cebu City, niadtong Mayo 29, 2025.
Ang maong pasidungog usa kailhanan sa ilang kaisog ug kalampusan sa pagpalambo sa enterprise development ilawom sa Farmers and Fisherfolk Enterprise Development Information System (FFEDIS). Ang LMPC, isip usa sa mga miyembro sa FC2C clusters, napamatud-an nga andam sa merkado, lig-on sa organisasyon, ug aktibo sa value chain development.
Kini nga milestone nagtugot sa LMPC nga mailhan isip usa sa mga modelo nga kooperatiba nga aktibong nitampo sa pagpalig-on sa panginabuhian sa mga mag-uuma ug mangingisda.
Ang ilang paningkamot dili lamang limitado sa paghatag og teknikal nga tabang apan apil sab ang pagpalapad sa merkado ug oportunidad alang sa mga miyembro. Ang ilang panaghiusa sa Department of Agriculture usa ka ehemplo sa epektibong kolaborasyon tali sa gobiyerno ug pribadong sektor.
Sa pagsaulog sa Buwan sa mga Mag-uuma ug Mangingisda, dako ang papel sa LMPC sa paghatag og plataporma alang sa malungtarong pag-uswag.
Atong ipadayon ang pagpasidungog sa mga kamot nga nagtanom ug nag-ani alang sa nasod. Pinaagi sa kooperatiba, atong lig-unon ang kaugmaon nga patas, mapuslanon, ug puno sa paglaom. / PR