Mahimong sirhan ang sanitary landfill sa Barangay Binaliw, Cebu City kon dili masulbad ang padayong reklamo sa mga residente nga duol niini.
Si Mayor-elect Nestor Archival niingon nga sa higayon nga molingkod na siya sa katungdanan, makighinabi siya sa operator sa landfill nga Prime Integrated Waste Solutions Inc., aron masulbad ang dugay nang problema sa kasikbit nga komunidad.
“Wala gyud ni ma-address ang kabaho ug ang tubig nga nagdagayday didto sa ubos,” matod ni Archival sa usa ka interbyu sa telepono kaniadtong Biyernes, Hunyo 6, 2025 bahin sa mga reklamo gikan sa mga residente, apil na sa silingang Consolacion, bahin sa baho ug kontaminado nga tubig.
Matod ni Archival nga kon dili masulbad sa operator kini nga mga isyu, mopagawas siya og pasidaan sa pakigtambayayong sa Department of Environment and Natural Resources (DENR).
Sayo niini, nanawagan ang mga lumolupyo sa Binaliw sa mga lokal nga opisyal nga sulbaron ang baho nga mugawas gikan sa basura.
“Ato na sila tagaan og warning nga dili gani mo mokuan ana… i-close na nato eventually kung makadaot man gyud sa lawas sa atoang constituents,” matod niya.
Gipasalig ni Archival sa publiko nga ang bisan unsang aksyon buhaton sa hustong paagi.
“Pero kinahanglan in a diplomatic way, tagaan nato sila’g chance. Dinhi man gud sa gobiyerno, kinahanglan pud tang maminaw kung unsa ilang problema,” ingon niya.
Matod niya nga kini nga pamaagi nahiuyon sa iyang mas lapad nga tumong sa pagpakunhod sa gidaghanon sa basura nga gidala sa landfill, nga gigastuan sa siyudad og gibanabana nga P650 milyunes matag tuig.
Giangkon ni Archival nga ang pagpatuman sa mga lakang aron maminusan ang gidaghanon sa basura dakong hagit ug mahimong makasugat og reklamo sa publiko.
Nisaad siya nga ipatuman ang usa ka polisiya nga “no segregation, no collection” ug ipatuman ang mga lakang sa composting sa tibuok siyudad.
Isip usa ka environmental advocate, nagplano usab si Archival og dako nga reforestation initiative.
Tumong niya nga makatanom og 250,000 ka kahoy sa iyang tulo ka tuig nga termino susama sa gidaghanon sa mga boto nga iyang nadawat sa nakalabayng eleksyon.
Gitinguha niya nga makigtambayayong sa mga opisyal sa barangay sa kabukiran aron mailhan ang angay nga mga lugar nga tamnan. / JPS