Usa ka langgam nga nakuryentihan maoy rason sa 20 minutos nga pagkaputol sa kuryente sa pipila ka bahin sa Barangay Basak, dakbayan sa Lapu-Lapu atol sa pagsugod sa Barangay and Sangguniang Kabataan Elections (BSKE) sa Lunes sa buntag, Oktubre 30.
Sa pakighinabi sa SunStar Cebu sa telepono, si Mactan Electric Company Inc. (MECO) Vice President ug General Manager Gilbert Pagobo nipasabot nga ang nakuryentihan nga langgam nga nagbitay sa usa sa mga poste sa kuryente sa maong dapit maoy hinungdan sa pagkabalda.
Matod ni Pagobo nga naalarma sila sa insidente mga alas 6:16 sa buntag ug naresolba ang insidente mga alas 6:35 o mga 19 minutos ang milabay.
Apektado sa pagkaputol sa kuryente ang mga lugar gikan sa Modena Subdivision hangtod sa mga bahin sa dalan Tangke, lakip ang usa sa mga sentro sa pagboto, ang Basak Elementary School.
Hinuon, wala kini makaapekto sa BSKE voting period, nga nagsugod mga alas 7 sa buntag.
Giklaro ni Pagobo nga gawas sa Barangay Basak, walay laing barangay sa dakbayan ang nakasinati og power interruption sa panahon sa botasyon. Siya nipasalig nga adunay mga personahe sa Meco nga gipakatap duol sa 38 ka mga voting center sa siyudad aron pagtubag sa bisan unsang problema sa kuryente hangtod nga mahuman ang BSKE.
BROWNOUT
Pipila ka mga lokalidad sa probinsya sa Sugbo nakasinati og power interruption pipila ka oras human nisira ang polling places sa BSKE sa Lunes sa hapon, Oktubre 30, 2023.
Ang Commission on Elections (Comelec) Cebu Province nakadawat sa taho nga adunay di momenos walo ka mga lokalidad sa habagatang Sugbo ang nakasinati og power interruption.
Sagad sa maong mga lungsod nahisakop sa ikapitong distrito.
Gipahibawo sa Comelec nga apektado sa pagkapawong sa kuryente ang Moalboal, Ginatilan, Alcantara, Alegria, Ronda, Dumanjug, Barili, ug Badian.
Ang power interruption nahitabo pipila ka minuto human hingpit nga misirado na ang voting precincts sa ala 1:45 sa hapon tungod sa nadaot nga cross arms sa kilovolt line sa lungsod sa Sibonga.
Sagad sa mga lokalidad nga nagsugod og sayo nangandam alang sa counting ug pag canvass sa mga balota.
Ang Comelec-Cebu nakig-alayon sa utility service provider nga Cebu Electric Cooperative-1 (Cebeco-1) aron mahibalik ang kuryente sa maong mga lugar.
Gipahibaw sa Cebeco-I nga sa alas 3:37 sa hapon nahibalik na ang supply sa kuryente.