Langyaw gipusil sa inilang rapper

NADAKPAN: Si Andrew Salera (tunga), hamtong, naila sa iyang alyas nga ‘Range 999, suspek sa pagpusil sa usa ka langyaw sa gawas sa bar sa usa ka inilang hotel sa Brgy. Lahug, dakbayan sa Sugbo, alas 8:20 sa buntag, Dominggo, Marso 17, 2024, nadakpan sa manhunt sa kapulisan sa Mabolo Police Station sa Cebu City Police Office. Estor­ya sa pahina 2. /
NADAKPAN: Si Andrew Salera (tunga), hamtong, naila sa iyang alyas nga ‘Range 999, suspek sa pagpusil sa usa ka langyaw sa gawas sa bar sa usa ka inilang hotel sa Brgy. Lahug, dakbayan sa Sugbo, alas 8:20 sa buntag, Dominggo, Marso 17, 2024, nadakpan sa manhunt sa kapulisan sa Mabolo Police Station sa Cebu City Police Office. Estor­ya sa pahina 2. / ARNOLD Y. BUSTAMANTE

Usa ka inila nga rapper sa dakbayan sa Sugbo ang nasikop sa manhunt sa kapulisan human nakapusil og usa ka langyaw sulod sa bar sa usa ka inilang hotel sa Barangay Lahug, dakbayan sa Sugbo, alas 8:20 sa buntag, Dominggo, Marso 17, 2024.

Ang nasikop giila nga si Andrew Salera, hamtong, naila sa iyang alyas nga ‘Range 999’ ug taga lungsod sa Boljoon, habagatan sa lalawigan sa Sugbo apan kasamtangang nagpuyo sa Barangay Bacayan, dakbayan sa Sugbo.

Si Salera maoy nag-unang suspek sa pagpusil sa usa ka American national nga Michael George Richey, 37, naigo sa iyang abaga.

Si Police Major Romeo Caacoy Jr., hepe sa Mabolo Police Station, maoy nangulo sa manhunt nga malampusong nakasikop sa suspek nga diha sa balay sa iyang higala sa Sunshine Valley sa Barangay Quiot, dakbayan sa Sugbo.

Sa imbestigasyon sa kapulisan, nasuta nga gikan nga nag-inom ang biktima sa usa sa mga bar sa hotel ug nakita sa CCTV camera nga samtang nagbarog kini sa gawas uban sa laing tulo ka mga lalaki, niabot ang usa ka sakyanan nga giingong gimaneho sa suspek ug usa ka lalaki ang nikanaog gikan sa backseat sa awto maoy nakita sa CCTV nga nipatid sa biktima.

Ug niduol ang langyaw sa driver’s side sa awto apan pipila ka segundo, usa ka buto sa armas ang nadungog ug nahagba dayon ang biktima.

Dali nga nisibat ang mga suspek sakay sa sakyanan.

Ang biktima daling gidala sa usa ka pribadong tambalanan sa dakbayan ug giingong naa na kini sa luwas nga kahimtang.

Sa interview sa media kang Salera, iyang gibutyag nga gibinastosan sa biktima ang iyang mga higala nga babaye sa sulod sa bar nga maoy hinungdan nga iyang gihimo ang pagpamusil.

Apan sa dihang gipangutana kon naa ba siya sa sulod sa bar sa dihang gibinastosan ang iyang mga amiga, ang suspek milihay sa iyang tubag.

“Dili ko motubag ana, Sir, basta ingon ani, Sir, di ba di ta mobuhat og sala sa tawo kon ang tawo walay sala di ba? Mao na ako gusto nga ipa­hibawo sa tanan kay di to mahi­tabo butanga kon wala siya mamastos, Sir. Mao ra may hinungdan, Sir, bisan kinsa siguro, Sir, imong anak bastoson. Mao ra nay hinungdan, Sir, walay laing hinungdan, Sir, namastos siya...” matod ni Salera.

Nakuha sa crime scene ang kalibre .45 nga armas nga dunay mga bala lakip na ang duha ka basiyo sa kalibre .45 nga pistola nga maoy gigamit sa pagpamusil.

Mag-atubang og kasong frustrated murder ug illegal possession of firearms ang suspetsado. / AYB

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph