Lantsa nasunog: 6 patay, 6 naluwas

Dario V. Gil
MORGE: Pipila sa mga patay nga tripolante sa lantsa nga nasunog sa lawod sa dakbayan sa Naga sa Miyerkules sa gabii, Hunyo 5, 2024, naa sa morge sa punerarya sa dakbayan sa Sugbo. / Dario V. Gil

Usa ka lantsa nga panagatan nasunog dihang kalit nibuto ug nisilaob ang makina nga giayo sa mga tripolante, alas 8:20 sa gabii, Miyerkules, Hunyo 5, 2024 sa lawod sa East Pob­lacion, dakbayan sa Naga.

Si Petty Officer First Class Joel Baring, commander sa Philippine Coast Guard (PCG) detachment sa Naga, nagkanayon nga ang King Bryan fishing boat dunay 12 ka tripo­lante.

Hulagway kuha ni Petty Officer First Class Joel Baring
RESCUE OPERATION: Ang mga sakop sa Philippine Coast Guard (PCG) Detachment sa dakbayan sa Naga atol sa ilang rescue operation sa pagkasunog sa lantsa nga panagatan sa lawod sa dakbayan niadtong Miyerkules sa gabii. Hulagway kuha ni Petty Officer First Class Joel Baring

Gikompirmar ni Baring nga unom ang ilang naluwas ug unom usab ang nakabsan sa kinabuhi nga pulos taga lala­wigan sa Masbate.

Ang namatay mao sila si Boyboy Bacolod, 29; Ariel Codilla, 37; Jonathan Sollano, 34; Joseph Sollano, hamtong na; Onjing Conel, 41; ug Dominic Cleret, 18.

Ang naluwas naglakip sa kapitan sa lantsa nga si Mark Anthony Sollano, 32, ug sila si Alvin Quiñones, 21; John Cloud Canones, 20; Alan Aviles, 18; Michael Bacas, 34; ug Miguel Cortes, 32.

Si Petty Officer 2nd Class Aaron James Cagigas, duty officer sa PCG detachment sa Naga, niingon nga bisan og layo ang distansya sa lantsa, ila pang nadungog ang buto ug nakita ang pag-ulbo sa kayo.

Dugang niya nga maayo na lang nga dunay tugboat nga naagi nga maoy unang niluwas sa mga sakay sa lantsa.

Samtang ang unang gikataho nga missing, naugkat nga patay hangtod sa pagkabuntag sa Huwebes, Hunyo 6, 2024.

Si Sollano, kapitan sa lantsa nga gikahinabi sa Superbalita Cebu, nagkanayon nga usa pa ka tuig siyang nagdala sa ma­ong fishing boat ug gikan sila sa Masbate ug naglawig pa­dulong sa Daanbantayan aron managat.

Sa lawod tungod sa Naga Sugbo, dason niya, nakasinati ang lantsa sa pagkadaot sa makita hinungdan nga ilang giayo.

Apan sa pagpaandar na, si Sollana niingon nga kalit nibuto ang makina hinungdan nga nalagpot siya ug wa na siya masayod kon unsay sunod nga nahitabo hangtod nga na-rescue.

Nasayran nga dunay karga nga ginalon nga gasolina nga reserba sa ilang pagbiyahe ug liquefied petroleum gas (LPG) tanks alang sa pagluto nga gi­tuohan nga gidakop sa kayo hinungdan sa dakong pag-ulbo sa sunog.

Dugang niya, lakip sa namatay mao ang iyang duha ka mga ig-agaw nga sila si Jonathan ug Joseph Sollano.

Ang mga patay nga napaig na gipangdala sa Saint Francis Funeral Homes sa N. Bacalso Ave., siyudad sa Sugbo.

Samtang, si Baring nagkanayon nga iyang pang gisusi bahin sa tulubagon ba sa balaud sa opisyal sa lantsa. /

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph