Gipalihok sa Kagamhanan sa Dakbayan sa Lapu-Lapu ang ilang Task Force El Niño samtang nag-andam ang mga awtoridad sa mas init ug mas uga nga kondisyon nga mahimong molungtad hangtod sa unang tunga sa 2027.
Gihisgutan kini atol sa Third Quarter Special Meeting sa Lapu-Lapu City Disaster Risk Reduction and Management Council (DRRMC) niadtong Huwebes, Septiyembre 10, 2026, sumala sa City Information Office.
Ang Visayas Chief Weather Forecasting Specialist sa Philippine Atmospheric, Geophysical, and Astronomical Services Administration (Pagasa) nga si Jhomer Eclarino nipresenta sa labing bag-ong outlook sa El Niño, nga nag-aghat sa mga lokal nga opisyal sa paghisgot sa mga lakang sa pagpangandam ug pagpaminus sa posibleng mga epekto niini.
Ang pinakabag-ong outlook nga gipresenta atol sa panaghugpong nagpakita nga ang nagpadayon nga El Niño mahimong mohugot ug molungtad hangtod sa unang tunga sa 2027, nga nag-aghat sa kagamhanan sa dakbayan sa pahugtan ang sayo nga pagpangandam ug inter-agency coordination.
Gitataw ni Mayor Ma. Cynthia “Cindi” Chan ang pagkamahinungdanon sa pagpangandam og sayo posibleng mga epekto sa ning matang sa panahon.
“Prepare early, coordinate closely, and ensure that our response is organized and responsive to the needs of every Oponganon,” matod ni Chan.
Gibalita sa Pagasa kaniadto nga ang usa ka kasarangan hangtod sa kusog nga El Niño anaa sa tropikal nga Pasipiko ug mahimong mograbe ngadto sa kusog kaayo nga level sa dili pa mahuman ang tuig.
Ang maong penomenon mahimong magdala og taas nga hulaw sa nagkalainlaing bahin sa nasod, diin ang Sugbo gilauman nga makasinati og uga nga kondisyon sa Nobiyembre ug dry spell sa Disyembre.
Ang dry spell mahimong molungtad hangtod sa Enero ug posible sa Pebrero 27 ang hulaw sa Sugbo.
Gihulagway sa Pagasa ang hulaw nga lima ka sunodsunod nga bulan nga adunay ulan nga 21 hangtod 60 porsiyento ubos sa normal nga level o tulo ka sunodsunod nga bulan nga adunay ulan nga labaw sa 60 porsiyento ubos sa average.
Ang taas nga panahon sa ubos-sa-normal nga ulan mahimong maghatag og pressure sa mga supply tubig, agrikultura ug uban pang mga sektor nga nagsalig pag-ayo sa regular nga pag-ulan.
Gipangulohan usab sa City Disaster Risk Reduction and Management Office (CDRRMO) ang panaghisgot sa City Ordinance No. 17-074-2026, nga gisuwat nila Councilors Annabeth Cuizon, Rufo Bering, ug Marciano Alforque Jr., nga naghatag sa legal framework alang sa pagmugna ug pag-activate sa Task Force El Niño.
Ang ordinansa naghatag sa pagmugna sa Task Force El Niño ug nagtukod og usa ka koordinado nga sistema alang sa pagpangandam, pag-monitor, ug pagresponde.
Lakip sa mga responsibilidad niini mao ang padayon nga pagmonitor sa mga kritikal nga kabalaka nga mahimong maapektuhan sa taas nga uga nga kondisyon, lakip ang level sa tubig, kahimtang sa panglawas sa publiko, presyo sa pagkaon, insidente sa sunog, ug kalinaw ug kahusay.
Ubos sa ordinansa, ang task force mahimong ma-activate sa pagpagawas sa usa ka DOST-Pagasa El Niño Alert o Advisory o pinaagi sa direktiba gikan kang Mayor Chan.
Ang task force malangkob sa Office of the Mayor, City Administrator’s Office, mga hingtungdan nga departamento sa kagamhanan sa dakbayan, mga ahensya sa National Government, ug mga komitiba sa City Council, diin ang CDRRMO magsilbe nga secretariat niini. / DPC