Tukoron sa Kagamhanan sa Dakbayan sa Lapu-Lapu ang usa ka task force aron sulbaron ug bantayan ang posibleng mga kaso sa Monkeypox (Mpox).
Si Outgoing Mayor Junard “Ahong” Chan nitug-an sa mga tigbalita niadtong Miyerkules, Hunyo 4, 2025, nga maghimo siya og usa ka joint task force nga langkuban sa mga lokal nga ahensiya aron sulbaron ang mga kaso nga naglambigit sa mga residente nga nagpakita og mga sintomas sama sa mga rashes sa panit, pagpanakit sa tutonlan, ug sakit sa kaunoran.
Mga sakop sa task force ang City Health Office, District Hospital, City Disaster Risk Reduction and Management Office, ug Lapu-Lapu City Police Office.
Dugang niya nga ang mga barangay health worker dunay importante nga papel sa pagbantay pag-ayo sa mga indibiduwal nga nagpakita sa mga sintomas diha sa ilang komunidad.
Gihinumdoman sab ni Chan ang mga hagit nga giatubang atol sa Covid-19 pandemic, nga ang sitwasyon kaniadto mas grabe.
Iyang gipasabot nga ang siyudad nakabuntog sa krisis pinaagi sa hiniusang paningkamot sa komunidad.
Usa ka executive order ang pirmahan ni Chan alang pagmugna sa task force. / DPC