Lapu-Lapu naay 1 ka kaso sa Mpox

Nakatala ang Siyudad sa Lapu-Lapu sa labing unang kumpirmadong kaso sa monkeypox (mpox) alang sa tuig 2025, apan ang pasyente hingpit nang naulian ug dili na makatakod.

Gikumpirmar sa hepe sa City Hospital Office (CHO), Agnes Realiza sa usa ka interbyu sa SunStar Cebu nga ang 27-anyos nga lalaki, nagpositibo sa viral nga sakit sa tungatunga sa Mayo, ug nakakumpleto sa 21 ka adlaw nga home quarantine.

Ang pasyente walay travel history ug mao kadtong unang gidudahan nga nataptan sa virus.

Matod ni Realiza nga ang pasyente nagpakita og sintomas sa panit sama sa rashes, ug gitambalan og antihistamines ug antibiotics.

“Para sa katol, antihistaminic ang giresita. Ang among medical officer maoy niatiman sa kaso ug naghatag og antibiotics para malikayan ang bisan unsang secondary bacterial skin infections,” matod ni Realiza.

Ang pasyente nagsugod sa pag-isolate sa ikaduhang semana sa Mayo ug gisusi pag-usab sa katapusan nga 21 ka adlaw.

Human nga wala nay mga sintomas, ang pasyente gideklarar nga naulian ug gihatagan og medical clearance sa usa ka doktor sa unang semana sa Hunyo.

Matod ni Realiza nga ang usa ka pasyente nga hingpit nang naulian dili na makatakod.

Gikumpirmar niya nga ang rashes sa pasyente naayo na ug nakabalik na sa trabaho.

Sayo niini, tulo ka residente nga nag-edad og 20 ngadto sa 35 ang nagpakita og sintomas nga susama sa viral infection, apan ang mga confirmatory test nga gihimo sa 2024, negatibo ang resulta.

Bisan pa sa pagkaayo ug pagkawala sa bag-ong kaso, giawhag sa CHO ang publiko nga magpabilin nga alerto ug magpakisayod bahin sa mpox.

“Ayaw'g ka-panic. Hibalu-i ang mode of transmission, mokaylap kini pinaagi sa skin-to-skin contact, dili sama sa COVID-19, nga airborne,” matod ni Realiza.

Gitambagan ni Realiza ang publiko nga ipadayon ang pagpanglimpyo sa panglawas sama sa kanunay nga paghugas sa kamot, paglikay sa daghang tawo, ug pagsul-ob og long sleeves alang sa dugang nga proteksyon.

Gipasabot usab niya ang kamahinungdanon sa pagpahibalo dayon kon dunay timailhan sa rashes nga mahimong i-report pinaagi sa mga hotline: 340-8626 o 0955-653-4096.

Gi-activate sab sa CHO ang mpox task force pinaagi sa executive order nga giisyu ni outgoing City Mayor ug Congressman-elect Junard “Ahong” Chan. / DPC