Girekomendar ang hinanali nga rehabilitasyon sa iladong food landmark sa Sugbo nga kanhi gitawag og “Larsian” karon Sugbo Sentro nga nahimutang duol sa Fuente Osmeña Circle sa Dakbayan sa Sugbo.
Kini subay sa gihimong surprise inspection sa mga sakop ubos sa buhatan ni Cebu Governor Pamela Baricuatro sa Martes, Hulyo 22, 2025.
Nisusi sa dapit mao si Paolo Uy, Cebu Provincial Investment and Promotions Division (CPIPD) head ug Chief of Staff, kauban ni Information Officer Ruben Licera.
Gibutyag ni Uy nga lakip sa ilang naobserbahan atol sa inspection mao ang giingong pipila ka mga abandonadong stalls, kahugaw sa dapit, giingong mahal nga baligya sa pagkaon, ug uban pa.
“Dili na nimo ma-feel ang vibe as it was before in fact murag nawala ang spirit nga Larsian and that is what we intend to bring back so we rename it back to Larsian. We want to bring in the food offerings that makes it Larsian,” matod ni Uy sa Hulyo 22.
Ang Larsian nailhan nga dangpanan sa mga turista ug bisita tungod sa mga tinda niining grilled barbecue, puso, ug lingaw nga dining experience.
Usa kini ka paghulagway sa culinary heritage sa Sugbo diin mapalit ang mga barato ug lokal nga mga produkto.
Sigon ni Uy nga ang kasamtangang kahimtang sa maong kan-anan maghatag og dili maayong epekto sa reputasyon ug turismo sa Sugbo.
“Wala na man sad guy klaro nga ga-manage. Maong gi-reactivate ang Economic Enterprise Council (EEC) aron matan-aw og balik ang mga enterprises nga nag-generate og revenue sa Capitol,” dugang ni Uy.
Ang resulta sa maong pagsusi gisumiter na sa buhatan sa gobernador ug gipahibalo na ang mga rekomendasyon niini sa Provincial Planning and Development Office alang sa hinanali nga rehabilitasyon sa maong lugar.
Sa nasayran, niadtong Septiyembre 2023 gibuksan pag-usab ang maong kan-anan human kini gi-renovate ug gi-rebrand sa Sugbo Sentro Fuente Osmeña ubos sa administrasyon ni Cebu Governor Gwendolyn Garcia. / ANV