Napatik sa kasaysayan si San Miguel Beermen star Marcio Lassiter isip labing bag-ong all-time three-point king sa Philippine Basketball Association (PBA).
Nahitabo kini niadtong Dominggo, Septiyembre 15, 2024, atol sa dakong kadaugan sa Beermen batok sa Brgy. Ginebra Gin Kings, 131-82, sa Governors’ Cup sa Smart Araneta Coliseum.
Ning maong duwa, nailog ni Lassiter gikan ni PBA legend Jimmy Alapag ang No. 1 nga puwesto sa padaghanay og napasulod nga three-pointers sa kinatibuk-an.
Sa sayong bahin pa lang sa 1st quarter, nakapasulod na og duha ka three-pointers si Lassiter nga nakatabla sa rekord ni Alapag nga 1,250 ka three-pointers.
Sa 7:11 minutos nga marka sa 1st quarter, nabuak na ni Lassiter ang rekord ni Alapag.
Pipila ka mga minutos ang nakalabay, naposte ni Lassiter ang iyang ikaupat nga three-point shot nga maoy nagsaka sa iyang rekord ngadto sa 1,252 ka three-pointers nga napasulod.
Ang upat ka three-pointers ni Lassiter sa 1st quarter maoy nagdugkat sa Beermen sa pagposte’g 23-7 nga labaw nga wala na nila buhii hangtod na sa katapusang gutlo.
Narehistro ni Lassiter ang bag-ong rekord sulod lang sa 537 ka mga duwa samtang ang natigom nga three-pointers ni Alapag iyang nahimo sulod sa 601 ka mga duwa.
Ang naa sa ikatulo sa listahan nga si Allan Caidic nakatali og 1,242 three-pointers sulod sa 598 ka mga duwa. / ESL