Nabulabog ang klase sa Medellin Elementary School sa Poblacion, Medellin, amihanang Sugbo, alas 11 sa buntag sa Biyernes, Nobiyembre 2023 sa dihang nadiskobrehan ang nagkadugta nga lawas sa usa ka lalaki.
Sa nakuhang kasayuran sa Superbalita Cebu gikan sa usa ka kasaligang tinubdan, nailhan ang lawas nga iya ni Wilson Tubos, 61, minyo, taga Brgy. Poblacion sa maong lungsod.
Si Police Major Timothy Romanillos, hepe sa Medellin police nga nahinabi sa Superbalita Cebu pinaagi sa telepuno, niingon nga usa ka magtutudlo ang nakatimaho og langsi nga baho gikan sa kalibunan likod sa tunghaan.
Iya kini nga gisusi ug nakurat ang magtutudlo, kinsa wa nganli, pagkakita sa lawas ni Tubos. Dali kini nga gi report nila sa kapulisan sa Medellin.
Ang kapulisan sa lungsod ni-request og personnel sa Scene of the Crime Operation (Soco) team aron mo-autopsy.
Matod ni Romanillos nga ang pamilya ni Tubos wa mahibulong nga wa kini mauli sa ilang balay kay nangaanad na sila niini kon mangahoy, tagdugay mahiuli.
Gibutyag usab sa pamilya nga ang tiguwang napaakan og iro di pa dugay nga hayan ang samad maoy namatyan.