LearnCon: Wa gibaha ang gipangpuy-an sa mga delegado

LearnCon: Wa gibaha ang gipangpuy-an sa mga delegado
SunStar Lapu-Lapu City

Way gikataho nga pagbaha nga natala sa mga pampublikong tunghaan nga nagsilbing billeting quarters sa Dakbayan sa Lapu-Lapu diin anaa ang 3,000 ka mga delegado sa Learners’ Convergence (LearnCon) Philippines 2024 namuyo.

Nunot sa pagbunok sa uwan niadtong Lunes, si Lapu-Lapu City Mayor Junard “Ahong” Chan nipahibawo human sa LearnCon opening ceremony sa Hulyo 9, nga si Ronald Ferrer, Department of Education (DepEd) Lapu-Lapu City assistant schools division superintendent, ni-monitor sa sitwasyon ug nikompirmar nga walay baha.

Ang Marigondon National High School (MNHS), Marigondon Elementary School, Bankal National High School, Looc National High School (LNHS), Basak Elementary School, Pusok Elementary ug Science and Technology Education Center mao ang pito ka gi-assign nga billeting quarters.

Gipasalig ni Chan nga alang sa kaluwasan ug seguridad sa mga partisipante, ila usab nga gipakatap ang mga police personnel, Red Cross, ug Local Disaster Risk Reduction Management Office ngadto sa billeting quarters.

Ang LearnCon PH usa ka tinuig nga youth leadership program nga gipasiugdahan sa Department of Education (DepEd) nga nagtumong sa pagpalambo ug pagpalig-on sa umaabot nga mga lider pinaagi sa makahuluganong diskusyon sa kultura, kahimsog, kaluwasan ug sports.

Karong tuiga, ang Dakbayan sa Lapu-Lapu maoy napili nga venue sa pagpahigayon sa youth leadership event uban sa pakigtambayayong sa City Government ug Department of Education.

MGA KALIHUKAN

Ang lima ka adlaw nga nasudnong kalihukan nga gisalmutan sa 228 ka school division offices sa tibuok 17 ka rehiyon sa Pilipinas ningpadayag sa ilang kahinam samtang sila nagpaabot sa mosunod nga mga kalihukan nga giandam sa DepEd hangtod sa Hunyo 12.

Si Shawn Ivann, usa ka estudyante gikan sa National Capital Region, nipaambit sa SunStar Cebu sa iyang kahinam sa umaabot nga LearnCon 2024 nga nagpasiugda sa bag-ong mga kultura nga ipaila kaniya.

Giila usab ni Ishlauren Maucesa nga taga Babag, Dakbayan sa Lapu-Lapu, ang kamahinungdanon sa pagpahigayon sa maong mga educational initiative sa nasod tungod kay makatabang sa mga tinun-an sa high school sama niya nga maedukar sa nagka­lainlaing hisgutanan mahitungod sa leadership ug nation building.

Si Dyan Fabroa ug Eugene Abuloc, mga magtutudlo sa Rehiyon XI, kinsa ningtambong sa katapusang duha ka LearnCon nga mga kalihukan niadtong 2022 ug 2023, nipadayag nga kining tibuok semana nga kalihukan maghatag sa mga estudyante ug mga chaperone og kahigayunan nga magkatapok ug mahimo’ng mas maayong lungsuranon.

Gidugang ni Fabroa nga ang mga delegado sa Rehiyon XI nagpaabot sa heritage tour.

Ang Cebu City Heritage Tour nga himuon karong Hulyo 12, sa dili pa molarga ang mga delegado, maghatag og kinatibuk-ang panglantaw sa lokal nga mga tradisyon ug kasaysayan sa Sugbo pinaagi sa lainlaing mga kabilin sa dakbayan.

Atol sa maong seremonyas, sila si Bise Presidente Sara Duterte ug Senador Imee Marcos mga pinasidunggang dinapit sa maong kalihukan nga gipahigayon sa Hoops Dome, Barangay Gun-ob Lapu-Lapu City diin naa sab si Kongresista Cindi King-Chan. / DPC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph