Init nga topic karon sa social media ang posible nga pagbalhin ni veteran All-Star LeBron James gikan sa Los Angeles Lakers ngadto sa Dallas Mavericks.
Nigawas kini nga posibilidad human miistorya si Rich Paul, ang agent ni James, nga ang iyang player gusto moduwa para sa championship ug didto sa team nga dunay taas nga tsansa nga mahimong kampiyon.
Ang Dallas Mavericks ug Cleveland Cavaliers mao dayon ang team nga nag-una sa pagpakita sa ilang tumong nga makuha ang four-time NBA champion.
Si James padulong na mogawas sa liga sa edad nga 40 anyos. Nakaduwa na kini og 22 ka seasons ug tumong niini nga pun-an ang iyang mga achievements sa di pa siya moretiro.
Apan taliwa sa mga trade rumos, giklaro ni ESPN Insider Tim MacMahon nga ang pagbalhin ni James sa Mavericks lisod mahitabo kay di makabenipisyo ang Lakers ug Mavericks sa maong trade.
“You’re giving up three or four rotation players for a potential ring-chasing retirement tour? That doesn’t make sense for Dallas. It doesn’t make sense for LeBron because he has a no-trade clause. ‘Hold on, I want to play with those guys, not have them go to LA,” sigon niya.
Padayon ni MacMahon nga lisod kini apan dili imposible kon ipaagi og buyout ang kontrata ni James, pinaagi niini makuyog ni James ang iyang kanhi teammates nga si Kyrie Irving ug Anthony Davis. / RSC