Lee, mao gihapon ang hari

Lee.
Lee.AP

Sa katapusang pagpahigayon sa National Milo Marathon Cebu Leg niadtong 2019 sa wala pa ang pandemic, gipamatud-an ni Joey Lee nga siya ang hari sa Sugbo sa 21-kilometer nga distansya.

Sa pagpahigayon og balik sa lumba kagahapon, Abril 7, 2024, sa Mandaue City, gilangkat lang gihapon ni Lee ang titulo sa paborito niyang kategoriya ug mas impresibo pa ang iyang gipakita.

Ang nag-unang runner sa Spectrum Runners Club nihuman sa lumba pinaagi sa pagrehistro og personal best nga usa ka oras, siyam ka mga minutos ug 50 ka mga segundos.

Niadtong 2019, si Lee, 26, igo lang nitali og 1:11:59 sa iyang pagdaog sa 21K men’s division.

Ning higayuna, gibiyaan og dako ni Lee ang nagsunod kaniya nga si Jovan Bensig, kinsa nahiluna sa ikaduha nga adunay oras nga 1:13:51.

Ang naa sa ikatulo nga si Darwin Locaylocay nitali og oras nga 1:15:11.

Sa female division, nipatigbabaw si Cherry Andrin pinaagi sa pagposte og oras nga 1:27:56. Nahiluna sa ikaduha mao si Jamine Cruz (1:34:50) samtang ikatulo si Kay Cundangan (1:36:40).

Ang laing mga sakop sa Spectrum Runners Club nga sila si Mark Mahinay ug Asia Paraase mao ang top winners sa 10K event.

Si Mahinay nioras og 32:31 aron patigbabawan ang 10K men’s diin iyang gilabwan og 10 segundos ang 2nd placer nga si Kenyan runner Eric Chepsiror. Si Andrew Kim Remolino (33:21) maoy 3rd placer.

Sa iyang bahin, si Paraase maoy midaog sa 10K women’s pinagi sa oras nga 39:08.

Si national athlete Raven Faith Alcoseba (42:06) maoy 2nd placer unya si Nicole del Rosario (46:48) maoy 3rd placer. / RSC

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph