DALI nga ni-viral ang music video sa Bisaya rock band Agressive Audio nga Liar Evil tungod kay human ang dul-an duha ka dekada, diha pa kini nahimuan og official music video.
Tuig 2005 pa na-compose ang maong kanta ug gi-release sa kahanginan niadtong 2006 ubos sa ilahang E.P. album nga Agressive Audio.
Apan ang sikat nga kanta kaniadto sa mga estasyon sa radyo, nibalik og ka-trending karon tungod sa ilahang gi-release nga music video niadtong Hunyo 30.
Ang video nga nakaangkon na og kapin 1.1 million views, init nga gihangop sa mga mahiligon og Bisrock hilabi na kadtong millenials nga maoy nakapaminaw sa pag-peak sa maong genre sa musika.
"Karon pa mi kahunahuna kay sa katong time nga murag kusog siya sa mga radio station, busy pud mi ato og gig niya mahal man gud maghimo og music video," matod sa maong banda sa mensahe niini sa Superbalita Cebu.
Ang direktor ug manager sa banda nga si Jon Dave Lepatan mao ang nakahunahuna nga hatagan og visuals ang maong sikat nga kanta.
"Pero kaning 'Liar Evil' nga MV ky among amigo ang nag-offer namo ana nga himuan jud kay everytime motukar mi sa lainlaing lugar, ang mga tao wala kaila sa Aggressive Audio. Kasagaran namo madunggan 'ilaha diay nang kanta or sila diay nagkanta ana?'
Matod sa bokalista sa maong banda nga si Eugene Corpin nga binarkada ra nga sungog ang "Liar Evil Ka" hangtod nga iyahang nahimuan og kanta.
Gikan sa orihinal nga miyembro, nagpabilin gihapon so Eugene, si Joel Ablanque sa drums, ug Vincent Ngalis sa bass. Napuno karon sa ilahang miyembro si Chris Amores sa guitar.
"Para namo lipay kaayo mi nga hangtod karon naa gihapon maminaw sa among mga kanta sa kadugay. Bisan pa man ug lahi na nga generation daghan man gihapon makasabay sa amo mga song," dihang gipangayoan ang banda sa ilahang panahom nga pabilin nga sikat ilang mga kanta.
Mapasalamaton sab ang Aggressive Audio sa ilang mga supporter ug miawhag kini nga padayon nga mosuporta sa Binisayang pinulongan.
"Supporta lang ta sa atong kaugalingong pinulongan nga mga kanta ma-Bisrock, Bispop or Bisrap kay kami padayon maghimo og mga kanta para nila/ninyo." / HBL