Gikondinar sa kandidato pagkamayor sa Lungsod sa Badian, Cebu ang pag-ambush nga niresulta sa kamatayon sa barangay coordinator sa kaatbang niya nga kandidato niadtong Lunes, Abril 28, 2025.
Si Cebu Province 7th District Board Member ug Badian Mayoral candidate Jerome Christian Librando nipagawas og pamahayag pinaagi sa iyang official Facebook account niadtong Martes, Abril 29, 2025, nga nagkondinar sa pag-ambush ug nanawagan nga di ipamolitika ang insidente.
“We condemn in the strongest possible terms the vicious attack that led to the killing of Former Barangay Councilor Guillermo 'Glen' Antipuesto, and the wounding of one of our loyal supporters, Santos 'Sonny' Ambrad,” nagkanayon ang kabahin sa post ni Librando.
Ang ambush sa Barangay Candiis nakapatay kang Antipuesto nga barangay coordinator sa laing mayoral candidate ug nakaangol ni Ambrad.
“No act of violence can ever be justified, especially one that results in the loss of life,” dugang niya.
Giklaro ni Librando nga dako siyang supak nga himuong pamulitika ang nahitabo.
“We also take serious exception to any attempt to politicize this tragedy by making baseless accusations or using it to further divide us. That these allegations are not only 'irresponsible' but also undermine the effort to seek truth and justice,” matod ni Librando.
Iyang gihagit ang kapulisan nga dalion ang pagsulbad sa krimen ug itaral sa hukmanan ang mga responsable.
Sa report sa SunStar Cebu niadtong Martes, Abril 29, si Antipuesto nailang aktibo nga purok leader nga nalambigit sa pagkampanya sa kandidatura ni kanhi konsehal sa barangay, Gerry Duque, nga nidagan pagkamayor sa Badian.
Ang insidente nahitabo pipila na lang ka adlaw sa di pa ang Mayo 12 nga election, hinungdan sa pagtumaw sa pagduda nga potilika ang motibo sa krimen.
Si Duque nikondinar sab sa krimen ug nibutyag nga si Antipuesto nakadawat og daghang hulga.
Samtang padayon nga gisusi sa kapulisan ang insidente, nakadawat sila og impormasyon nga dunay utang si Antipuesto kantidad og P90,000 gikan sa usa ka tawo nga taga Dalaguete. / CDF