Libreng konsultasyon sa gatosan ka pasyente

Dul-an 300 ka mga pasyente nga adunay mga problema sa bugonbugon, cysts, hernia, hemorrhoids, ug uban pang kondisyon sama sa breast lumps, thyroid disorders, ug orthopedic concerns ang nasusi subay sa gipahigayon nga libreng konsultasyon sa Sabado, Agusto 2, 2025 sa City Health Services Office sa Dakbayan sa Danao.

Kabahin kining maong screening sa preparasyon sa umaabot nga Medical ug Surgical Mission nga ipahigayon sa Agusto 16 ug 17 sa Cebu Provincial Hospital – Danao (CPH-Danao).

Gipahigayon ang konsultasyon pinaagi sa pag-abag sa Chong Hua Hospital ug University of Cebu Medical Center (UCMed), uban sa suporta sa Cebu Provincial Health Office.

Human sa inisyal nga pagsusi, gipangayo sa mga doktor ang dugang laboratory tests aron mas masuta ang kahimtang sa pasyente. Kini nga tests himuon sa CPH-Danao.

Kon mahuman ug makompleto ang laboratory results, kini maoy susihon ug basahon sa Internal Medicine specialist alang sa pinal nga assessment ug pagdeterminar kon ang pasyente kwalipikado ba alang sa libre nga operasyon.

Kon adunay mga pasyente nga mopasar sa screening apan dili maapil sa surgical mission schedule sa Agosto 16–17, hatagan gihapon sila og laing iskedyul aron maseguro nga matambalan sila.

Ang mga doktor nipasalig nga operahan gihapon ang tanang kwalipikadong mga pasyente, bisan pa og nahuman na ang mismong adlaw sa mission.

Gipasalig niini nga ang mga operasyon buhaton sa ilang pribadong mga ospital, libre ug walay bayad, basta naka-avail ang pasyente sa screening. / ANV